मोहाडी : येथील जय भोले मित्र मंडळाच्या सार्वजनिक गणेशोत्सव मंडळाच्या नवीन कार्यकारिणीची निवड करण्यात आली. मंडळाच्या अध्यक्षपदी कोहिनूर चव्हाण, उपाध्यक्षपदी सार्थक उचाळे, खजिनदारपदी धीरज सोनवणे, तर सचिवपदी यश सोनवणे यांची निवड करण्यात आली.
जय भोले मित्र मंडळाच्या वतीने सार्वजनिक गणेशोत्सवाच्या माध्यमातून दरवर्षी विविध सामाजिक, सांस्कृतिक व समाजप्रबोधनात्मक उपक्रमांचे आयोजन केले जाते. गणेशोत्सव हा केवळ धार्मिक उत्सव न राहता त्याला सामाजिक बांधिलकीची जोड देण्याचा मंडळाचा प्रयत्न असतो. यामध्ये समाजप्रबोधन कार्यक्रम, क्रीडा स्पर्धा, सांस्कृतिक कार्यक्रम तसेच विविध सार्वजनिक उपक्रम राबविले जातात.
मंडळाच्या वतीने समाजातील गोरगरीब व गरजू नागरिकांना मदत करण्याबरोबरच सामाजिक जाणीव निर्माण करणारे उपक्रम घेतले जातात. तसेच लहान मुलांच्या शारीरिक व मानसिक विकासाला चालना मिळावी, त्यांच्यातील सुप्त गुणांना वाव मिळावा आणि त्यांच्यामध्ये सामाजिक व सांस्कृतिक मूल्यांची रुजवणूक व्हावी, या उद्देशाने विविध कार्यक्रमांचे आयोजन केले जाते.
वारकरी संप्रदायाच्या विचारधारेतील भक्ती, संस्कार, एकोपा आणि सामाजिक समतेचा संदेश मंडळाच्या उपक्रमांतून देण्याचा प्रयत्न केला जातो. धार्मिकतेसोबतच सामाजिक सलोखा, बंधुभाव आणि समाजातील सर्व घटकांना एकत्र आणण्यावर मंडळाचा भर आहे.
मंडळाच्या विविध उपक्रमांच्या यशस्वी आयोजनासाठी सचिन पाटील, घनश्याम चव्हाण, मधुकर परदेशी, हेमंत गवांदे, सोमनाथ चव्हाण यांच्यासह मंडळाचे इतर सदस्य सातत्याने योगदान देत आहेत. सार्वजनिक कार्यक्रम असो अथवा सामाजिक उपक्रम, सर्वांना सोबत घेऊन सामूहिक सहभागातून काम करण्याची भूमिका मंडळाकडून सातत्याने जपली जात आहे.
नवीन कार्यकारिणीच्या माध्यमातून आगामी काळातही सामाजिक, सांस्कृतिक, क्रीडा व समाजप्रबोधनात्मक उपक्रम अधिक व्यापक स्वरूपात राबविण्यात येणार असून, सामाजिक हिताला प्राधान्य देत मंडळाची सामाजिक बांधिलकी अधिक बळकट करण्याचा निर्धार यावेळी व्यक्त करण्यात आला.
